हिमायतनगर प्रतिनिधी/ हिंगोली लोकसभा मतदारसंघातील महाविकास आघाडीचे उमेदवार नागेश पाटील आष्टीकर यांच्या प्रचारासाठी महाविकास आघाडीतील नेते सक्रिय झाले असुन मतदारसंघात गावोगावी जाऊन प्रचार करीत आष्टीकर यांना मताधिक्याने निवडून देण्याचे आवाहन करत आहेत.मतदारांचा देखील मोठ्या प्रमाणात प्रतिसाद मिळत आहे.
हदगाव हिमायतनगर विधानसभा मतदारसंघातील दोन्ही नेत्यांना लोकसभेसाठी उमेदवारी मिळाली असुन महाविकास आघाडीकडून नागेश पाटील आष्टीकर तर महायुती शिंदे गटाकडून बाबुराव कदम कोहळीकर यांना उमेदवारी जाहीर झाली आहे.दोन्ही उमेदवार एकाच मतदारसंघातील असल्याने या मतदारसंघात मोठी चुरस निर्माण तर झाली त्याबरोबरच नेत्यांची प्रतिष्ठा पणाला लागली आहे. महाविकास आघाडीचे उमेदवार नागेश पाटील आष्टीकर यांच्या प्रचारासाठी माजी खा.सुभाष वानखेडे, हदगाव विधानसभा मतदारसंघाचे विद्यमान आ.माधवराव पाटील जवळगावकर यांनी कंबर कसली आहे.आ.माधवराव पाटील जवळगावकर यांनी तालुक्यातील कार्यकर्त्यांना घेऊन सकाळी सहा वाजल्यापासून गावोगावी भेटीगाठी सुरू केल्या आहेत.
शनिवारी हिमायतनगर तालुक्यातील अनेक गावात आ.जवळगावकर यांनी मतदारांच्या भेटी घेतल्या आणि महाविकास आघाडीचे उमेदवार नागेश पाटील आष्टीकर यांना मताधिक्याने निवडून देण्याचे आवाहन केले आहे. प्रचारासाठी निघालेल्या आ.माधवराव पाटील जवळगावकर यांचे गावोगावी मतदारांनी स्वागत केले आहे.दिवसभर जवळगावकर यांच्या मागे कार्यकर्त्यांचा मोठा फौजफाटा सोबत होता.
मतदारसंघाच्या विकासासाठी महाविकास आघाडीचे उमेदवार नागेश पाटील आष्टीकर यांना निवडून देण्याचे आवाहन केले आहे.
तर माजी खा.सुभाष वानखेडे यांनी शनिवारी हदगाव तालुक्यातील गावोगावी मतदारांच्या भेटी घेऊन महाविकास आघाडीचे उमेदवार नागेश पाटील आष्टीकर यांना निवडून देण्याचे आवाहन केले आहे.
